काठमाडौं – सहकारी महासंघका अध्यक्ष मिनराज कँडेलले सरकार पुग्न नसको ठाउँमा सहकारी पुगेर काम गरेको बताएका छन्।

डडेलधुराका कृषि सहकारीले त्यहाँका ६८ घर राउटेलाई पनि स्थायी बसोबास गर्ने ठाउँ निमार्ण गर्न सहयोग गरेको उनले बताए।

राउटेका बालबालिका तथा युवालाई सहकारीले नै सिप सिकाएर रोजगारी प्रदान गर्ने र विद्यालय पठाउनेको लागि प्रेरणा दिने गरेको उनले बताए।

शुक्रबार भएको प्रभम राष्ट्रिय अर्थशास्त्री सम्मेलनमा उनले चेपाङ समूदायलाई पनि सहकारीले स्थापित गराउन सफल भएको बताए। उनले भने, ‘६ महिनाभन्दा बढी खाना खाने खाद्यन्नको समस्या भएर गिठ्ठा भ्याकूर खाने चेपांङ समुदायलाई सहकारीले आफूसँग आवद्ध गराएर आत्मनिर्भर बनाउन सफल भएको छ।’

अहिले नेपालमा ३० हजारभन्दा धेरै सहकारी सञ्चालनमा रहेको उनले जानकारी दिए। त्यसमा ७३ लाखभन्दा धेरै सदस्यहरु रहेका छन्। जसमा ५६ प्रतिशत महिलाको सहभागिता रहको छ। नेतृत्वमा ४० प्रतिशत महिला रहेको कँडेलले बताए।

सहकारी क्षेत्रमा हालसम्म सात खर्ब रुपैयाँ पूँजी परिचालित छ। पाँच अर्ब बचत, एक खर्ब सेयर, एक खर्ब कोषको रकम रहेको उनले जानकारी दिए। यसले एक लाखभन्दा धेरैलाई प्रत्यक्ष रुपमा रोजगारी सृजना गरेको र १० लाखभन्दा धेरैलाई अप्रत्यक्ष रुपमा रोजगाी कँडेलले बताए।

वित्तीय कारोबार गर्ने सहकारीहरु १४ लाख र कृषिक्षेत्रमा कारोबार गर्ने सहकारी संस्थाहरु १० हजारभन्दा बढी रहेको उनले बताए। यसैगरी, दुग्ध सहकारीहरु १७ सयभन्दा धेरै रहेका छन्। बहुउद्देश्य र अन्य प्रकृतिका संस्थाहरु पनि रहेको उनले बताए।