वीरगञ्ज – मोटरसाइकल चोरी गरेको आरोपमा पर्सा प्रहरीले एक युवकलाई पक्राउ गरेको छ ।

मोटरसाइकल चोरी गरी भाग्दै गरेको अवस्थामा युवक पक्राउ परेका छन् । जिल्ला प्रहरी कार्यालय पर्साका अनुसार वीरगञ्ज महानगरपालिका– १४ का २३ वर्षीय सुमन पटेललाई मोटरसाइकल चोरी गरी भाग्दै गरेको अवस्थामा पक्राउ गरिएको हो । शुक्रबार बिहान वीरगञ्ज–१६ नगवाका ३० वर्षीय नेजामुल हक अन्सारीको नाममा दर्ता रहेका ना ५५ प ४९८६ नम्बरको रोयल ब्लू रंगको १ सय ५० सिसी पल्सर मोटरसाइकल पार्किङ्ग गरेर राखिएको अवस्थामा चोरी भएको थियो ।

घरको आँगनमा पार्किङ गरी राखिएको मोटरसाइकललाई पटेलले चोरी गरी सिर्सिया ड्राईपोर्ट भित्र पुरानो कन्टेनर भित्र लुकाइ छिपाई राखेको सूचनाको आधारमा प्रहरीले छापामारी गरेको थियो । प्रहरीलाई देखेर मोटरसाइकल लिएर भाग्दै गरेको पटेललाई प्रहरीले पक्राउ गरी सोमबार सार्वजनिक गरेको छ । पटेलमाथि चोरी सम्बन्धी मुद्दा दर्ता गरी कारवाही प्रक्रिया अगाडि बढाइएको जिप्रका पर्साले जनाएको छ ।