गोरखा – गोरखा नगरपालिका–१२ छापगाउँका ४६ वर्षीय काशिराम कुमालको हत्या आरोपमा सोही ठाउँका ५९ वर्षीय पदमबहादुर कुमाल पक्राउ परेका छन् ।

गत शनिबार टाउकोमा चोट लागेको अवस्थामा काशिराम छापगाउँमा मृत फेला परेका थिए । घटनाको प्रकृति हेर्दा शंस्कास्पद देखिएपछि अनुसन्धानको क्रममा हत्या भएको खुल्न आएको जिल्ला प्रहरी कार्यालय गोरखाका एसपी केदार खनालले बताए ।

मादक पदार्थ सेवन गरेका पदमबहादुरले सामान्य विवादमा काशिरामको टाउकोमा चिर्पट प्रहार गरी हत्या गरेको खुल्न आएको प्रहरीले जनाएको छ । मृतक काशिराम नाताले पदमबहादुरका भतिज हुन् । उनीहरुबीच चुरोट पिउने विषयमा विवाद भएको खनालले बताए ।

पदमबहादुरलाई बुधबार पक्राउ गरी कर्तव्य ज्यान कसुर मुद्दामा जिल्ला अदालतबाट सात दिनको म्याद लिएर अनुसन्धान भइरहेको प्रहरीले जनाएको छ ।