नेपालगञ्ज – बाँके प्रहरीले अटोमेटिक पेस्तोल र ९० ग्राम ब्राउनसुगरसहित ३ जनालाई नियन्त्रणमा लिएको छ।

इलाका प्रहरी कार्यालय धनौली र राधापुर प्रहरी चौकीको टोलीले खजुरा गाउँपालिका वडा नं १ बहादुरपुरका गल्छी भन्ने रवीन्द्र थापा, वडा नं २ का मनिष थापा र नेपालगञ्ज उपमहानगरपालिका वडा नं १० भृकुटीनगरका सुरेश रोक्कामगरलाई प्रहरीले म्याग्जिन नभएको अटोमेटिक पेस्तोल र ९० ग्राम ब्राउनसुगरसहित पक्राउ गरेको हो।

बाँके प्रहरी प्रवक्ता डीएसपी मधुसुदन न्यौपानेका अनुसार रवीन्द्रको घरमा ब्राउनसुगरको कारोबार भइरहेको छ भन्ने सूचनाका आधारमा पुगेको प्रहरीले खानतलासी गर्दा ९० ग्राम ब्राउनसुगर र उनी सुत्ने कोठाबाट पेस्तोल बरामद भएको थियो।

प्रहरीले केही दिनअघि मात्रै डुडुवाबाट अटोमेटिक पेस्तोलसहित तीन जनालाई नियन्त्रणमा लिएको थियो।