वीरगञ्ज – वीरगञ्ज भन्सारबाट फलफूलको जुसको निर्यात बढेको छ। ०७८/७९ को पहिलो ६ महिनाको अवधिमा वीरगञ्ज नाका भएर फलफूलको जुसको निर्यात बढेको वीरगञ्ज भन्सार कार्यालयले जनाएको छ।

चालु वर्ष साउनदेखि पुस मसान्तसम्म वीरगञ्ज नाका भएर नेपालबाट २ अर्ब ५८ करोड २१ लाख एक हजार बराबरको फलफूलको जुस निर्यात भएको हो।

यस अवधिमा ३ करोड ४८ लाख ७३ हजार ५ सय ५२ लिटर विभिन्न फलफूलको जुस निर्यात भएको वीरगञ्ज भन्सार कार्यालयले जारी गरेको तथ्यांकमा उल्लेख छ।

गत आर्थिक वर्षको तुलनामा ५७ प्रतिशतले बढी हो। गत आर्थिक वर्षको पहिलो ६ महिनाको अवधिमा भने एक अर्ब ६४ करोड ८४ लाख ६० हजार मूल्य बराबरको २ करोड २७ लाख १३ हजार ४ सय १८ लिटर फलफूलको जुस निर्यात भएको थियो।

निर्यात बढेपछि भन्सार कार्यालयले उठाउने राजस्वमा समेत वृद्धि भएको छ। गत वर्ष फलफूलको जुस निर्यातबाट वीरगञ्ज भन्सार कार्यालयले २ लाख २१ हजार राजस्व संकलन गरेकामा चालु वर्षमा निर्यात बढेसँगै ३ लाख १४ हजार राजस्व संकलन गरेको छ।

गत आर्थिक वर्षको तुलनामा ४२ प्रतिशतले बढी राजस्व संकलन भएको भन्सार कार्यालयले जनाएको छ।

वीरगञ्ज नाका भएर नेपालबाट विदेशमा मुख्यतः भटमास र पामको प्रशोधित तेल, फलफूलको जुस, सूर्यमुखीको प्रशोधित तेल, जमोठ कपडा, सेन्थेटिक यार्न, च्यावनप्रास, बत्तिसा त्रिफला, स्पोर्टस सुज, भटमासको पिना, दन्त मञ्जन, उनी गलैँचा, कार्पेटलगायत वस्तु निर्यात हुने गरेको छ।