इटहरी – सुनसरीको दुहबी नगरपालिका ९, छापबेलीमा बुधबार साँझ ट्रिपरको ठक्करबाट एक बालिकाको घटनास्थलमै मृत्यु भएको छ ।

मृत्यु हुनेमा सोही ठाउँको जय बाबा इटा भट्टामा कार्यरत भारतीय नागरिक रघुपुल इस्लामकी छोरी ९ वर्षीया ममिता इस्लाम रहेको १ नम्बर प्रदेश ट्राफिक प्रहरी कार्यालय इटहरीले जनाएको छ । कार्यालयका प्रवक्ता प्रहरी नायबउपरीक्षक (डीएसपी) सुमन तिम्सिनाका अनुसार सोही इटा भट्टाको को १ ख ५४५१ नम्बरको ट्रिपरले ठक्कर दिँदा ममिताको मृत्यु भएको हो ।

दुर्घटना गराउने ट्रिपर र त्यसका चालक धनुकटाको शहीदभूमि–४ का ३० वर्षीय हेमराज राईलाई अनुसन्धानका लागि नियन्त्रणमा लिइएको प्रहरीले जनाएको छ । चालकको लापरबाहीका कारण दुर्घटना भएको प्रहरीको प्रारम्भिक अनुसन्धानले देखाएको छ ।