काठमाडौँ – पूर्वप्रधानमन्त्री एवं नेकपा एमालेका वरिष्ठ नेता झलनाथ खनालले राष्ट्रपति भेट्न आउँदा आफूलाई खुसी लागेको बताएका छन्।

राष्ट्रपति विद्यादेवी भण्डारीसँगको भेटपछि पत्रकारहरुसँग बोल्दै वरिष्ठ नेता खनालले यस्तो प्रतिक्रिया दिएका हुन्।राष्ट्रपतिसँगको भेटका क्रममा वर्तमान परिस्थितिको बारेमा कुराकानी भएको नेता खनालले जानकारी दिए।उनले भने, ‘हामीले एकछिन भलाकुसारी गर्‍यौँ। विगतका कुराहरु पनि हामीले गर्यौँ। अहिलेको वर्तमान स्थितिको बारेमा पनि अलिकति कुराकानी भयो। उहाँले पार्टी, आन्दोलन, एकतावद्ध भएर जाओस्, लोकतन्त्र राम्रो भएर जाओस्, सुदृढ भएर जाओस्, राष्ट्रपतिको हैसियतले मेरो यही चाहना छ भन्ने कुरा उहाँले व्यक्त गर्नुभयो।’

आफ्नो स्वास्थ्यप्रति राष्ट्रपतिले चिन्ता प्रकट गरेको खनालले बताए।उनले भने, ‘उहाँले मेरो स्वास्थ्यप्रति चिन्ता प्रकट गर्नुभयो। मैले भने– म त्यस्तो अस्वस्थ छैन। म स्वस्थ नै छु । मेरो स्वास्थ्य सामान्य नै रहेको छ। म अहिले पनि धेरै मिटिङ, बैठक, सभाहरुमा गइरहेको छु। डाक्टरहरुले जे भनेका छन्, त्यसलाई ध्यानमा राखेको मैले उहाँलाई जानकारी गराए।’आफ्नो भन्दा पनि पार्टीको स्वास्थ्य ठूलो कुरा भएको राष्ट्रपतिलाई बताएको उनको भनाइ छ।

खनालले भने, ‘हामीले उहिले नै जीवन एक किसिमले सेक्रिफाइस गरिसकेको अवस्था हो। अहिलेको जीवन भनेको त नाफाको जीवन हो। नाफाको जीवन जसरी प्रयोग गरेपनि केही फरक पर्दैन। त्यसकारण हाम्रो आफ्नो व्यक्तिगत स्वास्थ्यको बारेमा मलाई चिन्ता होइन, चिन्ता चाहीँ पार्टीको बारेमा हो। कम्युनिष्ट आन्दोलनको हो। पार्टीमा कतिपय समस्या उत्पन्न भइरहेको बेलामा यहाँ आउनुभएको छ, सबै पार्टीहरु बलिया भए मात्रै लोकतन्त्र बलियो हुन्छ। लोकतन्त्र बलियो हुनु भनेको पार्टी बलियो हुने कुरा हो भनेँ।’

स्रोतका अनुसार भेटका क्रममा नेता खनालले पार्टीलाई बचाउन भूमिका खेल्न राष्ट्रपतिलाई आग्रह गरेका थिए। साथै आफूहरु पार्टी एकताको पक्षमा रहेको भन्दै खनालले फागुन २८ गतेको ओलीको निर्णय फिर्ता हुनुपर्ने सर्त राष्ट्रपति समक्ष राखेको पनि स्रोतको दावी छ।