दाङ – दाङ देउखुरीको लमही नगरपालिकामा वडाध्यक्ष र कार्यपालिका सदस्यहरू आन्दोलित भएका छन् ।

यस अघि लमही नगरपालिकाकै प्रमुख प्रशासकीय अधिकृत भएर काम गर्दा बहुमत कार्यपालिका सदस्यले हटाईएका गेहेन्द्रबहादुर डाँगीलाई पुन ल्याउन खोजेको भन्दै वडा अध्यक्ष सहित १९ जना कार्यपालिका सदस्य मध्ये १३ जना विरोधमा उत्रिएका छन् ।डाँगीले विभिन्न परियोजनामा घोटाला गरेको, योजना पूरा नहँुदै भुक्तानी दिएको, १४ रुपैयाँको औषधिलाई २८ रुपैयाँको टेन्डर पास गरेको आन्दोलित पक्षको आरोप छ । विरोध मै विषयगत समितिबाट १२ जना जनप्रतिनीधिहरुले सामुहिक राजीनामा समेत दिएका छन् ।उनीहरुले डाँगीलाई जम्मेवारी दिएमा नगर कार्यपालिकाको सम्पूर्ण बैठकहरू बहिस्कार चेतावनी यस अघिनै दिइसकेका छन् । प्रशासकीय अधिकृत ल्याउने अधिकार नगर प्रमुखमा रहेको र यसमा अधिकांश सदस्य तथा वडा अध्यक्षहरुले मौन सहमती जनाएको नगर प्रमुख कुलबहादुर केसीको दाबी छ ।

उनले छिटैनै समस्याको समाधान खोजिने बताए । पारदर्शिताका साथ जनताको सेवामा काम गर्नका लागि नगरपालिकाले समाधान खोज्नु आवश्यक छ ।