काठमाडौँ – नेपाली कांग्रेसका नेता डा. मिनेन्द्र रिजालले सरकारलाई विश्‍वासको मत दिन नसकिने बताएका छन् ।

कांग्रेसका केन्द्रीय सदस्य समेत रहेका प्रतिनिधि सभा सदस्य नेता रिजालले बृहत नागरिक आन्दोलनले काठमाडौँमा गरेको कार्यक्रममा आफूहरूले प्रधानमन्‍त्री केपी शर्मा ओलीलाई साथ दिन नसक्‍ने बताए ।’सरकारलाई विश्वासको मत दिन सक्दैनौं, नेता रिजालले भने, हामी अविस्वास प्रस्तावको पक्षमा छौं । उहाँ प्रधानमन्त्री बनेदेखि नै हाम्रो अविश्वास छ ।’

ओलीसँग राजनीतिक बहुमत देखिए पनि प्राविधिक रूपमा बहुमत नभएको रिजालको भनाइ छ । उनले प्रधानमन्‍त्री ओलीले संविधानको धारा ७६ (२) अन्‍तरगत सरकार सञ्‍चालन गर्न नचाहेको बताए । ”प्रधानमन्त्रीलाई संविधानको धारा ७६ (२) मा बसिरहन मन छैन । ७६ को धारा ५,६,७ मा बस्न मन छ,’ उनले भने ।