काठमाडौंको बालाजु-बाइपास क्षेत्रमा सडक विस्तारबाट पीडित बनेका स्थानीयहरुले माइतीघर मण्डलामा सरकारविरुद्ध प्रदर्शन गरेका छन् । उनीहरुले विभिन्न मागसहितका ब्यानर बोकेर प्रदर्शन गरेका हुन् ।

विकासको नाममा जारी प्रतिगमनविरुद्ध बृहत् नागरिक आन्दोलनको ब्यानरमा पीडितहरु पनि आन्दोलनमा सहभागी भएका हुन् । बालाजु क्षेत्रमा गैरन्यायिक तवरले सडक विस्तार भएको उनीहरुको भनाइ छ । सडक विस्तारका कारण ४२ घरपरिवार विस्थापित भएको भन्दै पीडितहरु आन्दोलित भएका हुन् । यसअघि आन्दोलनकै क्रममा केही अभियन्ताहरु पक्राउ परेकाले उनीहरुको बिनाशर्त रिहाइको पनि माग गरेका छन् । आन्दोलनका क्रममा गत बुधबार बाइपासबाट मीन बहादुर शाही, महेश्वर मानन्धर, सञ्जय तामाङ, दिपेन श्रेष्ठ, भीमदेव श्रेष्ठ र रूचित श्रेष्ठ पक्राउ परेका थिए ।

प्रदर्शनमा सहभागीले ‘डोजर आतंक बन्द गर’, ‘सम्पूर्ण मातृभाषालाई सम्मान गरौँ’, ‘प्रहरी दमन बन्द गर’, ‘सर्वोच्च अदालतको आदेशको पालना गर’ लगायतका नारा लगाएका छन् ।