मुम्बई – भारतीय कमेडियन कपिल शर्माले सन् २०१७ मा राजीव ढींगराको फिल्म ‘फिरंगी’मा अभिनय गरेका थिए । यो फिल्ममा उनले प्रहरी बन्न प्रयासरत एक युवाको भूमिकामा अभिनय गरेका थिए ।

बलिउड लाइफमा प्रकाशित समाचारअनुसार यिनै निर्देशक राजीव अर्को नयाँ फिल्म बनाउदैछन् । जुन फिल्ममा कपिल नभई कपिलका सहकर्मी तथा मिल्ने साथी चन्दन प्रभाकरले अभिनय गर्दैछन् ।‘फिल्ममा चन्दनले कमिक भिलेनको भूमिका निभाउनेछन् र बिन्नू ढिल्लों फिल्ममा प्रमुख भूमिकामा देखिनेछन्’, राजीवले भनेका छन् । राजीवले फिल्ममा चन्दन एक पानी माफियाको भूमिकामा देखिने बताए । जो हरेक समय आफ्नो समूहसँग बसेका हुन्छन् ।चन्दनले फिल्मको कथा मनपरेको बताए । ‘म जहिल्यै अलिक फरक चरित्र निभाउन चाहन्थें । फिल्मको कथाबस्तु सुनेपछि काम गर्न सहमत जनाएँ’, चन्दनले भने । कपिल, राजीव र चन्दन नौं कक्षाबाट साथी बनेका हुन् ।‘हामी एकै सहर र एकै स्कुलका विद्यार्थी हौं । कपिल र म ९एमा थियौं । जबकि चन्दन ९बीमा थिए । हामीले एकै थिएटरमा सहकार्य गर्यौ । त्यसपछि म ‘द ग्रेट इण्डियन लाफ्टर च्यालेन्ज’सँग जोडिएँ ।’ राजीवले भनेका छन् ।

फिल्मको नाम ‘होटल प्यासा’ राखिएको छ । फिल्ममा राजीव, नितिन केनी, नवीन चन्द्र र शान्ति भूषण रोयको लगानी हुनेछ ।