डडेल्धुरा: डडेल्धुरामा यस वर्ष पहिलोपटक शनिबार हिमपात भएको छ । दुई दिनदेखिको मौसम बदलीसँगै भएको वर्षाका कारण डडेल्धुराका उच्च भेगमा हिमपात भएको हो ।

जिल्लाको साहुखर्क, हगुल्टे, भालुमारे, आनारखोली, सुइडोव लेक सहित विभिन्न स्थानमा हल्का हिमपात भएको छ । वर्षा सँगै भएको हिमपातका कारण डडेल्धुरामा अत्याधिक चिसो बढेको छ ।डडेल्धुरा लगायत सुदूरपश्चिमका अन्य पाहाडी जिल्लाका उच्च भागमा पनि हिमपात भएको छ । जिल्लाको सदरमुकाम सहित उच्च भागमा बढेको चिसोका कारण यस क्षेत्रको जनजीवन प्रभावित भएको छ ।

स्थानीयहरु आगो तापेर बसेका छन् । चिसोका कारण विशेष गरी वृद्ध, वृद्धा र बालबालिका बढी प्रभावित भएका छन् । यद्यपि हिमपातले गर्दा कृषि तथा अन्न बालीलाई फस्टाउन सजिलो हुने बताइन्छ ।