हिमाली जिल्ला डोल्पाका एक समाजसेवी युवाले व्यक्तिगत खर्चमा सिंगो गाउँलाई नै ग्यास चुलो र सिलिण्डर बाँडेका छन् ।ठुलीभेरी नगरपालिका वडा नं ३ दुनैमा बस्दै आएका युवा मन बुढाले वडा नं ४ तिप्ला गाउँका १ सय २१ घरधुरीलाई ग्याँस चुल्हो र सिलिण्डर वितरण गरेका हुन् ।

व्यक्तिगत ९ लाख ६८ हजार खर्च गरेर नेपालगञ्जबाट सिलिण्डर र चुल्हो ल्याएर बितरण गरेको स्थानीय राजबहादुर बुढाले बताए । सदरमुकाम दुनै स्थित सरस्वती माध्यामिक विद्यालयका विद्यालय व्यवस्थापन समितिका अध्यक्ष समेत रहेका बुढाले जिल्लामै नमुना काम गरेकाले यस्तै दिर्घकालिन सोच राखेर अन्य युवाले पनि समाजसेवामा लाग्नुपर्नेमा जोड दिए ।दुर्गम क्षेत्रका महिलाहरुको व्यस्त जीवनशैलीलाई लक्षित गर्दै केही हदसम्म भएपनि राहत मिलोस भन्ने उदेश्यले व्यक्तिगत रुपमा चुल्हो सहितको सिलिण्डर वितरण गरिएको युवा मन बुढाले बताए । महिलाहरुलाई साँझपख खेतबारीबाट फर्केर आईसकेपछि अगेनोमा कष्टका साथ खान पकाउन पर्ने अवस्था देखेर आफूले ग्याँस वितरण गरेको बुढाको भनाई छ ।

त्यतिमात्र नभई प्रत्येक दिन चाहिने दाउराको स्रोत जंगल नै भएकाले स्थानीयको जंगलप्रतिको परनिर्भता घटाई वन विनाश रोक्न पनि यो कदम चालिएको बुढाले बताए ।