मकवानपुर — आयोजक विजय युथ क्लब, हेटौंडा र सेन्ट्रल कलेज, भरतपुर गोल्डकप फुटबल प्रतियोगिताको सेमिफाइनलमा प्रवेश गरेका छन् । आयोजकले सर्लाहीलाई २–० र भरतपुरले काठमाडौंको एफसी रियालेलाई ४–१ गोलअन्तरले पराजित गर्दै अन्तिम चारमा स्थान बनाएका हुन् ।

हेटौंडाको जितमा विदेशी खेलाडी साहिद र हिसुब थपलियाले गोल गरे । साहिदले खेलको छैटौं मिनेटमा र हिसुबले ७२ औं मिनेटमा गोल गरे । हेटौंडाकै विमल राना म्यान अफ द म्याच भए । प्रतिस्पर्धात्मक खेलमा सर्लाहीका खेलाडीहरूले राम्रो प्रदर्शन गरे पनि हेटौंडाको तर्फबाट ‘ए’ डिभिजन लिगमा सहभागी भइसकेका अनुभवी खेलाडीहरूका अगाडि फिनिसिङमा पटक–पटक चुकेका थिए । हेटौंडाका तर्फबाट राष्ट्रिय टोली सदस्य रञ्जन विष्टसमेत सहभागी थिए ।

विदेशी खेलाडी जोन ग्लोरीको ह्याट्रिक प्रेरित भरतपुरको जितमा रञ्जित आले मगरले पनि थप एक गोल गरे । ग्लोरीले ३५, ३७ र ६९ औं मिनेटमा गोल गर्दै ह्याट्रिक गरे । प्रतियोगितामा ह्याट्रिक गोल गर्ने पहिलो खेलाडी बनेका ग्लोरी म्यान अफ द म्याचसमेत भए । भरतपुरका रञ्जितले १८ औं मिनेटमा गोल गर्दै टोलीलाई अग्रता दिलाए । काठमाडौंका रञ्जित तिवारीले ५७ औं मिनेटमा एक मात्र गोल गरे ।