काठमाडौं– ललितपुरको बालकुमारीबाट एउटा पेस्तोल र ४ राउण्ड गोलीसहित प्रहरीले २ जना युवकलाई पक्राउ गरेको छ।

‘युएस मेड’ लेखिएको १ थान पेस्तोल र त्यसमा लाग्ने गोली ४ राउण्डसहित २ जनालाई पक्राउ गरिएको जिल्ला प्रहरी परिसर ललितपुरले जानकारी दिएको छ।

पक्राउ पर्नेमा सर्लाहीका सुरेन्द्र थिङ र सोही स्थानका वीरबहादुर बम्जन छन्। जिल्ला प्रहरी परिसर लालितपुर र प्रहरी प्रभाग बालकुमारीबाट खटिएको टोलीले उनीहरूलाई पक्राउ गरेको हो।

प्रहरी स्रोतका अनुसार प्रारम्भिक अनुसन्धानका क्रममा उनीहरु हतियारको तस्करी गर्ने व्यक्ति भएका खुलेको छ। उनीहरुले पेस्तोल लगायतका साना हतियारहरु तस्करी गर्ने गरेको प्रहरी स्रोतले जानकारी दिएको छ।