छिपहरमाई गाउँपालिका–१ मिर्जापुरको गोरेटो बाटो हुँदै अवैध रूपमा भारततर्फ लैजाँदै गरेको वन्य पशुपन्क्षी लाटोकोसेरो चरा सहित दुईजना भारतीय नागरिकलाई शनिबार प्रहरीले पक्राउ गरेको छ।

पक्राउ पर्नेमा भारत विहार पश्चिम चम्पारण थाना बागाहा ग्राम औसानी–१ ठेगाना भएका ४२ वर्षीय मृतुञ्जय सिंह र भारत विहार पश्चिम चम्पारण थाना नरकटियागञ्ज ग्राम मनिहारी–३ ठेगाना भएका ३५ वर्षीय शेख अनवर रहेका छन्।

उक्त स्थानमा अवैधरूपमा वन्यपशुपन्क्षी लाटोकोसेरो चरा (उल्लू) १ वटा नेपालबाट भारततर्फ लाँदै गरेको भन्ने सूचना प्राप्त हुनासाथ ईलाका प्रहरी कार्यालय पोखरियाबाट खटिएको प्रहरीले उनीहरूलाई उक्त पन्क्षी लिई भारततर्फ जाँदै गरेको अवस्थामा पक्राउ गरेको हो।

उनीहरूलाई वन्यजन्तु संरक्षण ऐन सम्बन्धी कसुर मुद्दामा आवश्यक कारबाहीको लागि डिभिजन वन कार्यालय वीरगञ्ज पर्सामा बुझाइएको प्रहरीले बताएको छ।