काठमाडौं– ‘आत्महत्या गर्छु’ भन्दै घरबाट हिँडेका युवकको प्रहरीले सकुशल उद्धार गरेको छ।

इलाम घर भइ ललितपुरको गोदावरी नगरपालिका–४ बडीखेल बस्ने ३० वर्षीय राजेश लिम्बुलाई ललितपुर प्रहरीले सकुशल उद्धार गरेको हो।

जिल्ला प्रहरी परिसर ललितपुरका अनुसार लिम्बु बुधबार बिहान ‘आत्महत्या गर्छु’ भन्दै हिँडेका थिए। लिम्बुले आत्महत्या गर्न लागेको भन्दै आफन्तले फोनमार्फत् जानकारी दिएपछि प्रहरीले खोजी सुरु गरेको थियो।

प्रहरी टोलीसँगै स्थानीय र आफन्तहरुले खोजी गर्ने क्रममा उनलाई ललितपुरको बडीखेलस्थित जंगलबाट उद्धार गरिएको जिल्ला प्रहरी परिसर ललितपुरले जानकारी दिएको छ।

विषादी सेवन गरी जंगलमा लडिरहेको अवस्थामा फेला परेका उनको उद्धार गरी उपचारका लागि सुमेरु अस्पतालमा भर्ना गरिएको छ। उनको अहिले सुमेरु अस्पतालको सघन उपचार कक्ष (आईसीयू)मा उपचार भइरहेको छ।