काठमाडौं – वैशाख ३० गते हुने स्थानीय तहको निर्वाचनका लागि मनोनयन दर्ता गर्नेहरुको पछिल्लो सूची प्राप्त भएको छ। जसअनुसार १ लाख ३७ हजार ४३ को मनोनयन भएको छ।

आयोगको प्रणालीमा अद्यावधिक भएको पछिल्लो सूची अनुसार प्रमुखमा ३ हजार २७६ र अध्यक्षमा ३ हजार २ सय ६४ को मनोनयन दर्ता भएको छ। त्यस्तै, उपप्रमुखमा २ हजार ९ र उपाध्यक्षमा २ हजार २९६ जनाको मनोनयन दर्ता भएको छ।

त्यस्तै, वडा अध्यक्षमा ३२ हजार २१७, महिला सदस्यमा २३ हजार ५२१, दलित महिला सदस्यमा २१ हजार २२१ र सदस्यमा ४९ हजार २३९ जनाको मनोनयन दर्ता भएको छ। सबैभन्दा धेरै मधेस प्रदेशमा ३४ हजार ७४७ र सबैभन्दा कम सुदूरपश्चिम प्रदेशमा ११ हजार ९८ जनाको मनोनयन दर्ता भएको छ।

सात सय ५३ स्थानीय तहका प्रमुख, उपप्रमुख, अध्यक्ष र उपाध्यक्ष, छ हजार ७४३ वडाध्यक्ष, सोही सङ्ख्यामा महिला सदस्य र दलित महिला सदस्य तथा १३ हजार ४८३ सदस्य गरी कूल ३५ हजार २२१ सदस्यका लागि यही वैशाख ३० गते निर्वाचन हुँदैछ ।

आइतबार र सोमबार देशभरका स्थानीय तहमा स्थापना भएका निर्वाचन अधिकृतको कार्यालयमा उत्साहपूर्णरूपमा मनोनयन दर्ता भएका थिए । आज उम्मेदवारको विरोधमा उजुरी लिने कार्यतालिका छ ।

वैशाख १४ र १५ गते मनोयनपत्र जाँच तथा उजुरीमाथि जाँचबुझ र निर्णय दिने, वैशाख १५ गते मनोनयन भएका उम्मेदवारको नामावली प्रकाशन तथा वैशाख १६ गते उम्मेदवारको नाम फिर्ता तथा उम्मेदारको अन्तिम नामावली प्रकाशन गर्ने कार्यतालिका छ ।