कुकुर मारेर पासोमा झुन्ड्याएको आरोपमा प्रहरीले पोखराबाट एक युवकलाई पक्राउ गरेको छ।

जिल्ला प्रहरी कार्यालय कास्कीका अनुसार पोखरा महानगरपालिका १९ का २३ वर्षीय सुदीप परियारलाई पक्राउ गरिएको हो।

उनले गएको चैत १८ गते पोखरा १६ जोगिमणि मार्गस्थित सार्वजनिक स्थानमा कुकुर मारेपछि घाँटीमा बाँधेर रूखमा झुण्ड्याएका थिए। त्यसको भिडिओ समेत बनाएर सामाजिक सञ्जालमा पोष्ट गरेपछि प्रहरीले घटनाको अनुसन्धान अघि बढाएको थियो।

उनको मोबाइल तथा फेसबुकमा समेत उक्त भिडिओ पाइएको कास्कीका प्रहरी नायब उपरीक्षक सुन्दर तिवारीले बताए।

परियारलाई पशुपंक्षीसम्बन्धी कसूरमा प्रहरीले कारबाही प्रक्रिया अघि बढाएको छ।