भन्सार छली गरेको आशङ्कामा प्रहरीले झापाबाट भारतीय नम्बर प्लेटको एउटा कन्टेनर र बिस्कुट नियन्त्रणमा लिएको छ । कन्टेनर चालक पनि पक्राउ परेका छन् ।

बिस्कुट लिएर भारतबाट नेपाल प्रवेश गरेको आर जे १८ जि बी ३७२१ नम्बरको कन्टेनर नियन्त्रणमा लिइएको झापा प्रहरीले जनाएको छ । कन्टेनरबाट २० लाख मूल्य बराबरको बिस्कुट बरामद गरिएको जानकारी प्रहरीले दिएको छ । प्रहरीका अनुसार कन्टेनर चालक शिशराम गोर्सी पनि पक्राउ परेका छन् ।
भारतबाट बिस्कुट लोड गरेर नेपाल आएको कन्टेनर रोकेर प्रहरीले चेकजाँच गरेको थियो । चेकजाँचका क्रममा आवश्यक कागजपत्र नभेटिएपछि बिस्कुटसहितको कन्टेनर नियन्त्रणमा लिँदै प्रहरीले चालकलाई पक्राउ गरेको हो ।

कन्टेनरमा बीस लाख मूल्य बराबरको बिस्कुट रहेको र कन्टेनरको मूल्य २५ लाख बराबर पर्ने प्रहरीको भनाइ छ । प्रहरीले नियन्त्रणमा लिइएको कन्टेनर र बिस्कुटसहित चालकलाई आवश्यक कारबाहीका लागि मेची भन्सार कार्यालय काँकरभिट्टामा बुझाएको छ ।