काठमाडौं – कपिलवस्तुको महाराजगन्ज नगरपालिका–४, राजपुरमा मिक्चर ट्रकले साइकलयात्री र तीन पैदलयात्रीलाई एकैसाथ ठक्कर दिँदा चारजना घाइते भएका छन् ।

घाइते हुनेमा साइकलयात्री महाराजगन्ज नगरपालिका–५ का ६० वर्षीय गुञ्जी यादव, पैदलयात्री उनकी ३० वर्षीया छोरी इन्द्रावती यादव, सात वर्षीया नातिनी कविता र ६ वर्षीय नाति वृजेशकुमार यादव रहेका छन् । उनीहरूलाई उपचारका लागि भैरहवास्थित युनिभर्सल कलेज अफ मेडिकल साइन्स अस्पतालमा पठाइएको छ । घाइतेमध्ये साइकलयात्री गुञ्जीको अवस्था गम्भीर रहेको जनाइएको छ ।

भारतीय नम्बरप्लेटको मिक्चर ट्रकले हिजो बेलुका करिब साढे ८ बजे उनीहरूलाई ठक्कर दिएको थियो । त्यसलगत्तै मिक्चर चालक फरार रहेकाले खोजी भइरहेको इलाका प्रहरी कार्यालय महाराजगन्जले जानकारी दिएको छ ।