सप्तरी – सहिद स्मारक ए डिभिजन लिगअन्तर्गत मंगलबार भएका सुरुवाती दुई खेल बराबरीमा सकिएका छन्।

दशरथ रंगशालामा भएको पुछारका क्लबद्वय ब्रिगेड ब्वाइज क्लब र च्यासल युथ क्लबबीचको खेल गोलरहित बराबरीमा सकिएको छ।

यता एन्फा कम्प्लेक्समा भएको अर्को खेलमा फ्रेण्ड्स क्लबले उत्कृष्ट पुनरागमन गर्दै जावलाखेलसँग अंक खोसेको छ।

फ्रेण्डेसले ३-० गोलले पछि परेको अवस्था उल्टाउँदै ३-३ गोलको बराबरी खेलेको हो। खेलको १२ मिनेटमा लोइक काउहिमले गोल गर्दै जावलाखेललाई अग्रता दिलाए। ४० मिनेटमा उनले टिमको अग्रता दोब्बर पारे। ४५ मिनेटमा रुपबहादुर लामाले गोल गर्दै जावलाखेलका लागि तेस्रो गोल गरेका थिए।

पहिलो हाफको इन्जुरी टाइममा जुडै गर्सियाले फ्रेन्ड्सका लागि पहिलो गोल गरे। ६९ मिनेटमा उनले दोस्रो गोल गर्दै फ्रेण्ड्सलाई खेलमा फर्काएका थिए। दोस्रो हाफको इन्जुरी टाइममा एन्थोनी फ्रान्कोइसले तेस्रो गोल गर्दै फ्रेण्ड्सलाई ३-३ गोलको रोमाञ्चक बराबरी गराए।

रोमाञ्चक बराबरीसँगै फ्रेण्ड्सले रेलिगेसन जोन छाड्न सफल भएको छ। १२औं स्थानमा उक्लिएको फ्रेण्ड्सको ७ अंक छ। ११औं जावलाखेल युथ क्लबको १० अंक भएको छ।

यता पुछारको च्यासल युथ क्लबको ६ अंक र ब्रिगेड ब्वाइजको ७ अंक रहेको छ।