सप्तरी -प्रधानमन्त्री केपी शर्मा ओलीले गरेको प्रतिनिधिसभा विघटनका विरुद्ध शनिबार जनता समाजवादी पार्टी नेपाल (जसपा)ले आज एक साथ तीन शहरमा विरोध सभाको आयोजना गर्ने भएको छ ।

विराटनगर, धनगढी र भैरहवामा आज जसपा नेपालले विरोधसभाको आयोजना गरेको हो । त्यसका लागि वक्ता केन्द्रबाट नै खटिएका छन् । विराटनगरको सभाका लागि पार्टी संघीय परिषद्का अध्यक्ष डा.बाबुराम भट्टराई, पार्टीका अध्यक्ष उपेन्द्र यादव र कार्यकारिणी सदस्य मृगेन्द्रकुमार सिंह प्रमुख वक्ताको रुपमा विराटनगर पुगिसकेका छन् भने धनगढीको सभाका लागि पार्टीका कार्यकारिणी सदस्यहरु नवराज सुवेदी, गोविन्द चौधरी र दुर्गा सोव पनि मुख्य वक्ताको रुपमा पुगिसकेका छन् ।त्यस्तै भैरहवामा हुने विरोधसभाका लागि पार्टीका अध्यक्ष महन्थ ठाकुर, कार्यकारिणी सदस्यहरु महेन्द्र राय यादव र सर्वेन्द्रनाथ शुक्ला पनि त्यहाँ पुगिसकेका छन् । आजको कार्यक्रम सम्पन्न भएपछि अर्को कार्यक्रम पुस २७ गते वीरगञ्ज, जनकपुर र नेपालगञ्जमा हुनेछ भने पुस २९ गते पोखरा, सुर्खेत र विर्तामोडमा हुनेछ ।

त्यसैगरी, माघ ३ गते धरान, मलगंवा, सिरहा, कलैया, तौलिहवा, रौतहटमा यस्तै विरोधसभा हुने जसपा नेपालले जनाएको छ । संसद विघटनपछि जसपा नेपाल आन्दोलनमा उत्रिएको छ । जसपाको यो दोस्रो चरणको कार्यक्रम हो ।