विराटनगर – विराटनगरमा आइतबार गरिएको संयुक्त बजार अनुगमनका क्रममा विल बिजक नराख्ने र उपभोक्तालाई विल पनि नदिने तीनवटा पसललाई ३५ हजार जरिवाना गरिएको छ ।

जिल्ला प्रशासन कार्यालय मोरङका सहायक प्रजिअ महेशप्रसाद तिम्सिनाको नेतृत्वमा गरिएको बजार अनुगमन टोलीले विराटनगर–७ स्थित पुरानो गुद्रीको ओम शुभम किराना पसल र मुन्ना किराना पसललाई जनही १५ हजार र शोभाम किराना पसललाई ५ हजार रुपैयाँ जरिवाना गरेको हो । उनीहरुले सामानको विल बिजक नराखेको साथै उपभोक्तालाई सामान विक्री गर्दा बिल पनि नदिएकोले उपभोक्ता संरक्षण ऐन २०७५ बमोजिम जरिवाना गरिएको जनाइएको छ ।अनुगमनमा बाणिज्य, आपूर्ति तथा उपभोक्ता संरक्षण कार्यालय, खाद्य प्रविधि तथा गुण नियन्त्रण कार्यालय, गुणस्तर तथा नापतौल कार्यालय, विराटनगर महानगरपालिका र प्रहरीसहितको टोली परिचालन भएको थियो ।

विस्तारै ठूला चाडबाडहरु नजिकिंदै गएकोले बजार अस्वस्थ बन्नसक्ने सम्भावना रहेको भन्दै विराटनगरमा बजार अनुगमनलाई निरन्तरता दिइने जनाइएको छ ।