काठमाडौं – काठमाडौं उपत्यकाका नदी किनारमा बसोबास गर्ने २ सय ५० भन्दा बढी मानिसलाई प्रहरीले उद्धार गरेको छ।

आइतबार रातिबाट परेको अविरल वर्षाका कारण बाढीबाट प्रभावित उपत्यकाका विभिन्न स्थानबाट उनीहरूलाई प्रहरीले उद्धार गरेको हो। बाढीबाट करिब चार सय घर डुवानमा परेको महानगरीय प्रहरी कार्यालयका प्रवक्ता प्रहरी उपरीक्षक सुशीलसिंह राठौरले जानकारी दिए। काठमाडौंबाट दुई सय ३५ र ललितपुरबाट १५ जनाको उद्धार गरिएको उनले बताए।

मनोहरा खोला किनारमा रहेको मूलपानीको बस्ती, काँडाघारी र बल्खु क्षेत्रबाट मानिसहरूलाई उद्धार गरिएको राठौरले जानकारी दिए। वर्षाका कारण खोला छेउका सुकुम्वासी बस्ती र होचो ठाउँ डुबानमा परेका छन्।