सल्यान – बाग्चौर नगरपालिका–११ पानीचौरस्थित वडा कार्यालय पहिरोको जोखिममा परेको छ । अविरल वर्षाका कारण माटोसँगै तारजाली बगाउँदा वडा कार्यालय जोखिममा परेको हो ।
पहिरोको जोखिममा परेपछि कार्यालयको कामकाजका लागि आएका मानिसहरू छेउतिर बस्न डराउने गरेका छन् । पहिरोले भवनको करिब ५ मिटर टाढाको छेउमा थुपारेको माटो र लगाएको तारजाली बगाएको वडाध्यक्ष मोहन खड्काले बताए । उनका अनुसार स्थानीय एक व्यक्तिले वडा कार्यालय भवननजिकैको जग्गामा डोजर लगाएपछि कार्यालय जोखिममा परेको हो ।
गत वर्ष करिब २७ लाख रुपैयाँको बजेटबाट चारकोठे भवन निर्माण गरिएको थियो । ‘भवन जोखिममा परेपछि सेवाग्राही पनि कामका लागि आउन छाडेका छन्,’ उनले भने, ‘ठूलो वर्षा भए भवन पहिरोले पुर्ने जोखिम छ ।’ उनका अनुसार बाफुखोलाका अधिकांश बस्ती जथाभावी सडक खन्दा पहिरोको जोखिममा छन् ।