नेकपा एमालेका उपाध्यक्ष भीम रावलले पार्टीको विभाजन रोक्नका लागि प्रयास नगर्न केही राजनीतिक दलका नेताहरूबाट दबाब र धम्कीयुक्त फोन आएको बताएका छन् ।
बुधवार प्रेस विज्ञप्ति जारी गर्दै उपाध्यक्ष रावलले एमाले कतै विभाजनबाट रोकिने भयले कतिपयलाई देखिने र बुझिने गरी रिगटा लागिरहेको बताएका छन् ।पार्टी अध्यक्ष तथा निवर्तमान प्रधानमन्त्री केपी शर्मा ओलीसँग बालुवाटारमा भएको भेटमा आफूलाई कार्यबाहक अध्यक्ष बनाउने विषयमा कुनै कुरा नभएको रावलले स्पष्ट पारेका छन् ।
विभिन्न अनलाइन सञ्चारमाध्यममा प्रकाशित समाचारप्रति रावलले आपत्ति जनाएका छन् । ‘पद र प्रतिष्ठाको लागि बाह्य शक्तिका सामु घुँडा टेक्दै देशलाई संकटतर्फ धकेल्नेहरूले नै मेरोविरुद्ध झूटा प्रचार घृणित तहमा झरेर गरेका हुन्,’ विज्ञप्तिमा उल्लेख छ ।