सप्तरी – उत्तर कोरियाले फेरि एकपटक जापानको सागरमा मिसाइल परीक्षण गरेको छ । मिसाइल परीक्षण आज (बिहीबार) बिहान भएकाे हाे ।

योसँगै उत्तर कोरियाले यस वर्ष गरेको यो छैटौं मिसाइल परीक्षण हो । उत्तर कोरियाले यो वर्षको पहिलो परीक्षण जनवरी ६ मा गरेको थियो । उत्तर कोरियाले ६ दिनअघि पनि क्षेप्यास्त्र परीक्षण गरेको थियो ।

अमेरिकाले उत्तर कोरियामाथि नाकाबन्दी लगाउन संयुक्त राष्ट्रसङ्घसँग अपिल गरेको थियो तर चीन र रुसले त्यसको प्रयासलाई रोकेका थिए ।

अमेरिकाले गत हप्ता मिसाइल प्रक्षेपणमा एकतर्फी प्रतिबन्ध लगाएको थियो । अमेरिकाले रुस र चीनबाट परीक्षण कार्यक्रमका लागि सामग्री खरिद गरेको आरोपमा ६ उत्तर कोरियाली, एक रुसी र एक रुसी फर्मलाई कालोसूचीमा राखिएको छ ।

अमेरिकाले आणविक कार्यक्रम रोक्न दबाब पनि दिइरहे पनि उत्तर काेरियाले भने अटेर गरिरहेकाे छ ।