सप्तरी – विद्यार्थी, किसान, मजदुरलगायत आर्थिक अवस्था कमजोर भएका नागरिकको निःशुल्क स्वास्थ्य चेकजाँचको व्यवस्था मिलाउन नेकपा एकीकृत समाजवादी निकट विद्यार्थी संगठन अनेरास्ववियूले आग्रह गरेको छ । स्वास्थ्य तथा जनसंख्या मन्त्रालयमा बुझाइएको ज्ञापनपत्रमा सरकारी अस्पतालमा निःशुल्क स्वास्थ्य चेकजाँचको व्यवस्था मिलाउन आग्रह गरिएको छ ।

अनेरास्ववियू अध्यक्ष सुदेश पराजुलीसहितको टोलीले स्वास्थ्य तथा जनसंख्यामन्त्री विरोध खतिवडालाई ज्ञापनपत्र बुझाउँदै विपन्न वर्गको उपचारमा विशेष ध्यान दिन माग गरेको हो । अनेरास्ववियूले स्वास्थ्य उपचार गर्न पाउनु हरेक नागरिकको जन्मसिद्ध अधिकार भएको र सोको जिम्मेवार राज्य बन्नुपर्ने बताएको छ ।स्वास्थ्य जस्तो संवेदनशील विषयमा राज्यको उदासीनता अनेरास्ववियूलाई कदापी स्वीकार्य नभएको पनि ज्ञापनपत्रमा उल्लेख गरिएको छ । कोरोना संक्रमणका कारण हरेक क्षेत्र प्रभावित भइरहेको अवस्थामा राज्यले आर्थिक अभावका कारण उपचार गराउन नसकेका सर्वसाधरणलाई विशेष ध्यान दिनुपर्ने संगठनले माग गरेको हो ।

टिचिङ अस्पताल, वीर अस्पताल, वीपी कोइराला स्वास्थ्य विज्ञान प्रतिष्ठान र पाटनलगायतका सरकारी अस्पतालमा निःशुल्क स्वास्थ्य चेकजाँचको व्यवस्था मिलाउन अनेरास्ववियूले स्वास्थ्यमन्त्रीसमक्ष आग्रह गरेको छ । उसले विद्यार्थीहरुलाई कोरोना विरुद्धको खोपको अनिवार्य व्यवस्था मिलाउनुपर्नेमा जोड दिएको छ ।