सप्तरी – महोत्तरीबाट स्रोत नखुलेको ३० लाख रुपैँयासहित एक युवकलाई प्रहरीले पक्राउ गरेको छ। मटिहानी नगरपालिका-३ बर्दाहा बस्ने २३ वर्षीय मोहम्मद सहाउदिनलाई स्रोत नखुलेको उक्त रकमसहित पक्राउ गरिएको महोत्तरी प्रहरीले जनाएको छ।

भारतबाट नेपालतर्फ आउँदै गरेको ज६प ६९४४ नम्बरको डिस्कोभर मोटरसाइकललाई प्रहरी चौकी मटिहानीबाट चेकप्वाइन्टमा खटिएको प्रहरीले टोली चेकजाँच गर्ने क्रममा सहाउदिनलाई पक्राउ गरेको महोत्तरीका प्रहरी प्रवक्ता एवं डीएसपी प्रकाश विष्टले जानकारी दिए।
उनका अनुसार पक्राउ परेका सहाउदिनले पिठ्युमा बोकेको कालो झोलाबाट २८ लाख र उनको ज्याकेटको खल्तीबाट २ लाख गरी ३० लाख नेपाली रुपैया बरामद भएको हो। उनको साथबाट प्रहरीले आइफोन-१२ प्रो म्याक्स एक थान समेत बरामद गरेको डीएसपी विष्टले जनाए।
उनलाई मोटरसाइकलसहित नियन्त्रणमा लिई आवश्यक कारबाहीको लागि जलेश्वर भन्सार कार्यालय पठाइएको जिल्ला प्रहरी कार्यालय महोत्तरीले जनाएको छ।