वीरगञ्ज – वीरगञ्ज महानगरपालिका–१२ मुर्लीमा रहेको पोखरीमा डुबेर दुईजना बालकको मृत्यु भएको छ ।

वीरगञ्ज महानगरपालिका–१५ निवासी उमेश शाहका छोरा १३ वर्षीय प्रितम गुप्ता र दिनेश शाहका १७ वर्षीय छोरा आशिषकुमार शाहको पोखरीमा डुबेर मृत्यु भएको हो।शनिबार दिउँसो दुवै बालक घरबाट हराएका थिए। हराएको भनी प्रहरीमा आफन्तले खबर गरेपछि खोजतलास गर्ने क्रममा दुवै बालकको शव मुर्लीस्थित पोखरीमा फेला परेको पर्सा प्रहरीका प्रवक्ता प्रहरी नायब उपरीक्षक ओमप्रकाश खनालले जानकारी दिए।

त्यस्तै शनिबार पर्साको बहुदरमाई नगरपालिका–४ स्थित तिलावे नदीमा डुबेर बेपत्ता युवक मृत अवस्थामा फेला परेका छन्।सोही नगरपालिका–२ पिपरा टोल बस्ने २२ वर्षीय श्यामकुमार साह मृत अवस्थामा भेटिएका हुन्।शनिबार विश्वकर्मा बाबाको मूर्ति सेलाउन गएका बेला नदीमा डुबेर बेपत्ता साहको शव नदीकै झाडीमा अडकेको अवस्थामा फेला परेको प्रहरी नायब उपरीक्षक खनालले बताए।

मृतक दुई बालकसहित युवकको शवलाई पोस्टमार्टमको लागि नारायणी अस्पतालमा राखिएको उनले जानकारी दिए।