धादिङमा सडक खन्दै गर्दा झरेको पहिरोमा स्काभेटर र त्यसमा रहेका २ जना पुरिएका छन् । रुबिभ्याली गाउँपालिकाको २ नम्बर वडामा सडक खन्दै गरेको अवस्थामा पहिरो खस्दा उनीहरु पुरिएका हुन् ।
सदरमुकाम धादिङबेसीबाट उत्तरी भेगमा जाने सडकको तिप्लिङ-सोमदाङ खण्डमा सडक खन्ने क्रममा खसेको पहिरोमा स्काभेटरका चालक र सहचालक पुरिएका हुन् । शुक्रबार साँझ सडक खन्ने क्रममा पहिरो गएको जिल्ला प्रहरी कार्यालय धादिङले जनाएको छ । स्काभेटरका सहचालक रुबिभ्याली कै जोजो तामाङ रहेको खुलेपनि चालकको परिचय खुलेको छैन ।
पहिरोमा पुरिएका दुवै जना र स्काभेटरको खोजी भइरहेको प्रहरीले जनाएको छ । उत्तरी धादिङको विकट गाउँमा घटनास्थल रहेकाले उद्धारको कार्यमा असहजता रहेको प्रहरीले जनाएको छ ।