प्रदेश २ को नाम र राजधानी तोक्न प्रदेशसभाले दोस्रोपटक प्रक्रिया बढाएको छ । प्रदेशसभा सचिवालयले बिहीबार प्रदेशको नाम र राजधानीका लागि प्रस्ताव दर्ताका लागि सूचना निकालेको हो । सचिवालयले वैशाख २ देखि ९ गते ३ बजेसम्म प्रदेशको नाम र स्थायी राजधानीको प्रस्ताव दर्ताका लागि समय तोकेको छ ।

प्रदेशसभामा रहेका राजनीतिक दल र सांसदले तोकिएको समयभित्र नाम र राजधानीसम्बन्धी प्रस्ताव दर्ता गराउन सक्ने सचिवालयका सचिव रञ्जित यादवले बताए । सचिवालयले बोलाएको सर्वदलीय बैठकमा राजनीतिक दलबीच भएको सहमतिअनुसार प्रस्ताव आह्वान गरिएको उनको भनाइ छ ।

नाम र राजधानी तोक्न २०७६ चैत ४ गते भएको मतदानमा सबै प्रस्ताव अस्वीकृत भएका थिए । गत वर्ष मत विभाजन गरेर प्रदेशको नाम र राजधानी टुंग्याउन मतदान गरिए पनि दुईतिहाइ नपुग्दा सबै प्रस्ताव असफल भएका हुन् । प्रदेशसभाले फेरि त्यही प्रक्रियाबाट नाम र राजधानी टुंग्याउन खोजेको छ ।